Berbera, 02, May, 2011-(Berberanews)- Madaxweynaha Jamhuuriyada Somaliland Axmed Maxamed Maxamuud (Siilaanyo) oo socdaal qaatay in ka badan laba todobaad ugu maqnaa qaar ka mid ah wadamada isu-taga Imaaraadka Carabta iyo Kuwait ayaa galinkii danbe ee maanta ka soo degay Gegida diyaaradaha Berbera.
Madaxweynaha oo ay siday diyaarad khaasa oo Kuwait ka soo qaaday waxa Madaarka Berbera ku soo dhaweeyay Madaxda Gobolka Saaxil iyo Degmada Berbera, Xubno ka mid ah golaha wasiirada, xildhibaanno, cuqaal, Taliyayaasha ciidammada kala duwan iyo dadweyne door ah, waxaannuu Madaxweynuhu salaan sharaf ka qaatay cutubyo ka tirsan ciidammada, iyadoo muuqaallada soo dhawayntiisa ay ka muuqatay hab-maamuus aad u sarreeya oo tan iyo xalay ay ku hawlanayaayeen saraakiisha Protoclka madaxtooyadda iyo masuulliyiinta Berbera.
Madaxweynaha oo qolka VIP-da warbixin ku siiyay saxaafadda waxa uu xogwaran kaga bixiyay kullamadii uu la yeeshay madaxda dalalka carbeed ee uu safarka ku tegay, isagoo ku dhawaaqay mashaariic lagu qiyaasay 15 milyan oo mashaariic maalgelineed lagaga fulin doono Somaliland. ”Aniga iyo waftigii aan hogaaminayay waxa aanu safar ugu maqneyn dalalka Imaaraadka carabta iyo Kuwait mudo todoba iyo toban casho ku siman, waxaanu madaxda iyo haayadaha dalalkaa aanu tagnay kala hadalay adkeynta xidhiidhka inaga dhexeeya iyo wax wada qabsi dhinacyo badan leh.
safarkayagani waxa uu ahaa mid midha dhala, waxa nalgu qaabiley hab maamuus aad u heer sareeya, waxaanu kala kulanay soo dhaweyn saaxiibtinimo oo walaalnimo ku dheehantay. Emiraatka carabta masuuliyiinta aanu la kulanay waxay kala ahaayeen sheekh Hamdaan binu Saayid alnahyan maliga qeybta galbeed emirateka carabta Abu Dubai, Raisal wasaara-ku-xigeenka Sheekh Mansuur, Wasiirka Tacliinta Sheekh Nahyaan Bin Mubaarik Nahyaan, Amiirka Raysul-Khaaima Sheekh Sucuud.
Madaxda dalka Kuwait ee aanu la kulanay waxay kala ahaayeen Amiirka Kuwait Sheekh Sabaax iyo xubno ka tirsan golaha Wasiiarada dalkaa, Dr Suleymaan oo ah guddoomiyaha hay’ada mashaariicda gargaarka.” ayuu yidhi Madaxweynuhu
Madaxweynuhu waxa uu faahfaahin ka bixiyay noocyada mashaariicda horumarineed ee dalalkaasi ka fulin doonaan Somaliland, isagoo arrimahaa ka hadlayana wax uu yidhi, Madaxda wadamadaas waxaanu u bandhignay inay inaga caawiyaan mashaariic kala duwan oo ay ka mid yihiin dhinacyada nabadgelyada, biyaha 150 ceel iyo 23 dhaam, caafimaadka waxbarashada iyo wadooyinka, inkastoo uu ahaa kulankaygii u horeeyay ee aan la yeesho madaxda carabta hadana waxay noo soo ogolaadeen mashaariic waaweyn oo noqon kara 15 milyan oo dollar,, kuwaasoo isugu jira 24 ceel, 20 dhaam iyo dayactirka wadada u dhaxaysa Berbera iyo Burco, waxa kale oo Kuwait balanqaaday inay waxbarashada iyo caafimaadka wax ka tari doonaan iyagoo soo diri doona khubaro qiimayn ku sammeeya mashaariicdan.
Dawlada Abu Dubai waxay noo ogolaadeen deeq waxbarasho oo 50 arday ah, annaguna waxaannu u soo bandhignay inaanu diyaar u nahay wixii maalgashi ah ee ay dalkeena ku samaynayaan, iyaguna waxay noo sheegeen inay ka faa’iidatysan doonaan furasada aanu siinay, waxaana dalka iman doona shirkado kala duwan oo doonaya inay maalgashadaan.”
Kala soco Berberanews su’aalo dhinacyo badan taabanaya oo warbaahintu weydiisay madaxweynaha
Berberanews.com
Hargeysa, Somaliland
