Hargeysa-(Berberanews)- Wasiirka wasaaradda arrimha gudaha Somaliland Maxamed Nuur Caraale (Duur), ayaa maanta ka hadlay hawl-gal ay Ciidamada Boolisku ku rarayeen dadka degan Cusbitaalkii hore ee jajabka, hawl galkaasi oo ay ku dhinteen wiil dhlinyaro ah saddex kale-na dhaawac ka soo gaadhay.
Wasiirka Arrimaha gudduhu waxa uu sidaas ku sheegay Shir jaraa’id ku qabtay Xafiiskiisa Magaalada Hargeysa, waxaanu Tacsi ugu diray Eleladii iyo Qaraabadii uu ka geeriyooday ALLE haw naxariistee Marxuun Maxamed Iid Ibraahin oo ahaa Wiil Dhalinyaro ah oo ku geeriyooday hawl galkaasi ay Ciidamada Amaanku kaga rarayeen dadkii daganaa dhismaha Cusbitaalkii hore ee jajabka.
Ugu horayn isga oo arrimhaas ka hadlaya, waxa uu yidhi “Waxa maanta dhacday hawlgal uu ciidanka boolisku fuliyay kaas oo keenay dhimasho iyo dhaawac aan lagu tallo galin, ugu horayn waxaan halkan Tacsi uga dirayaa ehelkii iyo qaraabadii uu ka geeriyooday ALLE ha naxariistee marxuun Maxamed Iid Ibraahim oo ahaa wiil dhalinyaro ah oo ay laba geeriyood ku dhaceen, waayo waalidka dhalay waxa uu ahaa waalid taag daran oo naafo ah markaa waa laba geeriyood Tacsi tiiraanyo leh baanu udiraynaa”
Wasiir Duur oo hadalkiisa sii wata waxa uu yidhi “Sidii ay wax u dheceen baadhid baanu ku haynaa. Hawlgalka uu Boolisku ku socday waxa uu ahaa hawl-gal qaran markaa tallaabo kasta oo ciidan marka la qaadayo waxa ka imanaya dhibaato, markaa dhimasho aan lagu tallo galin maadaama oo ay dhacday dhiiga qofka bina aadanka ahina uu yahay wax qaali ah oo aanay ahayn in la dhayalsado , waase wax adduunyada dhaca. Waxaan aad uga ugu xumahay sidii ay wax u dhaceen waxaan amar ku bixinay in baadhitaan la galo oo sidii ay wax u dheceen la baaadho. waayo geeri lagu tallo galay may ahayn, falkasta oo la fulinaayo waxaan lagu tallo galin baa ka yimaada. Masuuliyad geeridaasi waa masuuliyad qaran, laakiin waxa noo garab socota siday wax u dheceen.”
Wasiirku waxa kale oo uu Shacabka u soo jeediyay inaanay ku dagaalamin dhulka danta guud, waxaanu yidhi “Waxa la fulinaayay waxay ahayd danguud, dan qof gaar ahi leeyahay may hayn. Dhismihii cisbitaalka jajabka ayaa waxa loo baahday in cisbitaal kale laga dhiso, horena cisbitaal bay u ahayd danta guudna waa hanti ummadeed, waxaan leeyahay tani way inagu dhacday laakiin dan guud oo dalku leeyahay qofawna ha ku dagaalamin, waxa kale oo aanu ka xumahay in iska horimaado hubaysan amma dhimasho keenaa dadka dhex maraan wixii dhibaato ah ee ka dhashayna wada hadal baanu ku xalinaynaa. Arrintani may ahayn qof-qof boos ka kicisanaaya laakiin waxay ahayd arrin qaran oo danta guud.”
Wasiirka Arrimaha guddaha oo la weydiiyay Su’aal ahayd in sida uu arko in Ciidanku rasaas u adeegsadaan dad Dan yar ah, waxa uu kaga jawaabay “Marka ciidan la hawl galinaayo cudud baa la hawl galinayaa, cududaana wixii keenay baa jira, muddo araf bilood ah waxa laga wada hadlaayay sidii cusbitaalkaa loo banyan lahaa markaa way ka fursan wayday in ciidan la galiyo sidii wax u dheceena waanu badhaynaa.
Wasiirka mar wax laga waydiiyay sababta keentay in dadkan laga raro guryihii ay daganaayeen waxa uu yidhi “Baahida caafimaad waxay umada u leedahay muhiimad aad u balaadhan, baahiyaha Cusbitaal ee jiraana inaguma filna waxaanaynu u baahanahay kuwo kale kanina waxaan cadynayaa in uu cusbiyaal uu yahay.”
Berberanews.com
Hargeysa, Somaliland
Email, info@berberanews.com
