shir doceed nin lagu dhalay, shir dugaalka uma bogo, ab-tirsiinta dalabta leh, axdi duuga kuma ogi…” Abwaan Xasan Daahir Ismaaciil (Weedhsame)
Berberanews-Abwaan Xasan Daahir Ismaaciil (Weedhsame) ayaa habeenkii xalay ahaa, Gabayo cusub kusoo bandhigay Hutel Maansoor ee Magaalada Hargeisa. Maansadan Magaceeda la yidhaahdo Dulmi-neceb ayuu abwaanku kaga waramayaa dulmiyada ka dhextaagan wadanka intii ay xukuumada hoogaamiyaha ka yahay madaxwayne Dr. Axmed Maxamed Maxamuud Siilaanyo.
Maansadan oo xalay curatay ayuu abwaanku ku falanqaynayaa sida ay ula muuqato dhaqdhaqaaqyada siyaasada dalka iyo sharciyada loogu talo galay in wax lagaga qabto baahiyaha guud ee qaranka oo aan sidii loogu talo galay u shaqaynin.
Abwaanku waxaa maansadan ku qaadaa dhigayaa shir-beeleedyada oo arin caado iyo dhaqan u noqotay beelaha Somaliland wada dagga oo dhan, tan iyo wixii ka danbeeyay shirkii Gar-adag oo madaxwaynaha talada dalka haya beeshoodu qabsatay. isagoo tilmaamaya in aanu jeclaysan siyaasiyiinta lagusoo dhalo shirarka beeluhu qabsadaan meelna aanu gaadhsiin karin danaha qaranka Jamhuuriyada Somaliland.
Maansada oo aanan halkan idiinku soo koobi karayn macnaha iyo murtida ay xambaarsan tahay, waa tan ee nala wadaaga.
Maansooy dareeneey
Dacar iyo ladh oogmaay
Inkastoon dakana iyo
Dibindaabyo kugu qabo
Marna la igu kaa duro
Ragna iigu kaa dudo
Kuma dayrin karayoo
Duunyaabad ii tee
Ii darar bal gaaxdii
Rabi iigu kaa dara.
Labaan la isu dari Karin
Degel ruuxa wada furay
Dannigiisu muu garan
Inay kala dibboodaan
Weheshiga dirsoociyo
Qarannimo dan mida lihi
In qabyaaladii dura
Saddexdii dalaaqood
Lagu siiyo duuduub
Waynagii dorraaduun
Qallinada ku duugnaye
Sawtan doonnan ee weli
Xisbiyada dumaashii
Dunta loogu wada xidhay
Geedigii diyaarkii
Dib maxaa u soo furay
Buladkiyo dabayshii
Iyo lama-degaankii?
Doorashooyinkeenii
Dubaaxdoodu yaab lee
Hungo lagu dar leefiyo
Hibashiyo ka sii daran
Noqotaye xaggay deri
Dawakhnaye ka leedahay.
Dimuqraadinimadii
Dihataye hadday tahay
Doqonkani fariidka ah
Dirataye ha ii dudin
Dacartani macaanka ah
Dalbataye dibnaa saar
Durduradan harraadka ah
Dul degtaye ku oon beel
Digo-rogashadeenaa
Sahan li’ dullaantoo
Wanqalkeedu dalabiyo
Dudmo uun ku koobnaa.
Maxaad doontay ee dana
Maxaad diiday ee daran
Maxaad door-bidee mudan
Maxaad deyrisee hadhay
Go,aan duunka weeyee,
Horta daacad maad tahay.
ninka doortay wadarnimo,
nin ka daaley weheshiga,
dan midaysa lama helo,
shir doceed nin lagu dhalay,
shir dugaalka uma bogo,
ab-tirsiinta dalabta leh,
axdi duuga kuma ogi,
qaran daacad laga jiro,
nolol doora kama sugo.
dhidar doori lagu yidhi,
dabcigaaga bahalnimo,
hadalkaasi kama dego,
dad shirqoolka lagu wado,
dannigoodu jecel yahay
digtoonowdu lama sama,
gudin daabku maqan yahay
damal raagay kuma jabo,
dhirta diirta lagu dhaqay,
midhaheedu damac ma leh,
didmo xaajo lagu galay,
dawo ruuxna kama helo.
qof dalaaqay garashada,
dubbihiisu kama tago,
inta aan la duri karin,
nin duruufta noloshaba,
doobigiisa ku sar jaray,
deris baahan kama naxo.
Danyartiyo saboolkii
Deyntii ma siiseen
Mise duunyadoodii
Weli way dawarayaan? .
Miyuu yimi damiirkii
Duday ee maqnaan jiray
Saw weli dalluuntii
Dadnimadu ma hoos taal ?
Dulmigii miyuu furay
Daacadii u mehersaday
Saw weli daryeelkii
Daranyada ma tuugsado?
Damacii miyuu nacay
Daribtii agoomaha
Dibjirkii gidaarada
Saw weli ma daadsana ?
Hankiinii miyuu duray
Dulligii u qaayibay
Saw weli duqaydii
Dufankii ma raadshaan ?
Xaqsoorkii ma deyraa
Mooradiisu duugnayd
Saw weli dillaalkii
Dulmanaha ma dala’sado?
Ma shalay dullaameen
Ma xalay dayoobeen
Saakana ma diifbaa
Ma dulmay ku noolyiin
Sidii loo dulleeyaa
Weli loo dul yaallaa
Golayaashii dabatadu
Xeerar aan la deyinoo
Duuduub ku dhaafaa
Waa dabeecadoodee
Ka daree ma maantay
Dacartiyo dhunkaashii
Darsadeen wadaamaha?
Damiirlaawayaashii
Ma maantay ku doodeen
Marka aan ka daadago
Xilka duudka ii sudhan
Danyartaan ka baaqsaday
Doorkay filaayeen
Deyr-cadkooda weyda ah
Aan ka sii dareersado.
Waxay nooga digayeen
Saw kuwan ku daakiray
Xaaraantii duufkii
Goormaa daliilkani
Xalaaleeyey soo degay
Kabo-qaad digreetiyo
Lagu keenay daadihin
Ma anaa dadweynaha
Duunyadooda hoo idhi….
Waxay Maansadani iyo maansooyin kaleba kasoo burqadeen maskaxdiisa Abwaanka Caanka Ah ee Xasan Daahir Ismaaciil (Weedhsame)
