Sheffield(berberanews)Gobolka ka mid ah Dalka Boqortooyada Ingiriiska, ayaa la filayaa in ay aqoonsi buuxa siiyaan Jamhuuriyadda Somaliland, ka dib markii dedaal iyo olole culus oo in muddo ah ay wadeen Jaaliyada reer Somaliland ee Magaalada Sheffield ku guuleysteen in maalinta arbacada ah Golaha deegaanka ee magaaladaasi u codeeyaan Aqoonsiga Somaliland.
Warsaxaafadeed ay soo saareen Guddida Aqoonsi raadinta Somaliland ee Jaaliyadda Magaalada Sheffield ee dalka Ingiriiska, ayaa waxa ay ku sheegeen in Maalinta Arbacada todobaadka dambe ee bisha 4-aad tahay labada in ay Golaha Deegaanka Sheffield ay cod u qaadayaan in ay aqoonsadeen Madax banaanida Somaliland.
Warsaxaafadeedkan ay soo saareen Jaaliyadda Somaliland ee Shefield oo faahfaahsani waxa uu u dhignaa sidan: “Jaaliyadda Somaliland ee Magaaladda Sheffield Waxay muddo dheer ku hawlanayd sidii waddanka Somaaliland Aqoonsi buuxa uga heli lahaa beesha caalamka, taas oo ah riyada ugu weyn ee ummaddu leedahay. Haddaba iyadoo taas laga duulaayo waxay Jaaliyadda Magaaladda Sheffield sawir buuxa ka bixisay xaaladda dhabta ah ee ka jirta dalka iyada oo ka bilowday gobolka ay degan yihiin si guud ahaan caalamka cadaadis loogu saaro qadiyadan, Jaaliyadu waxay soo bandhigtay wax yaabihii u qabsaday tan iyo muddadii ay reer Somaliland la soo noqdeen xorriyadii ka luntay 1960kii, wakhtigaas oo ay Somaliland aqoonsi buuxa ka heshay 33 dawladood oo adduunka ka mid ah. 23 sanood oo ay Somaliland xor ahayd waxay dhisatay dawladnimo dhamaystiran oo aanay cidina ka caawin, waxay qabsadeen doorashooyin xor iyo xalaal ah oo aan ka dhicin badi waddamada Afrika, waxay la dagaalameen budhcad badeeda halaaga baday adduunka, waxay la dagalameen xagjirnimada, waxayna ummadda reer Somaliland iyagoo isku duuban dhisteen dhammaan shuruudiihii dal madax banaan looga baahnaa. Si hadaba taas loo xaqiijiyo, Jaaliyadda Somaliland ee ku dhaqan Magaalada Sheffield waxay ku guulaysatay in Golaha degaanka Magaaladda Sheffield oo ka mid ah Gobolada ugu waa weyn waddanka Uk aqoonsi buuxa uu siin doono wadanka Somaliland, 2/4/2014 oo ay inaga xigaan maalmo koobani haddii alle idmo.
Maalintaas oo noqonaysa Arbacada soo socota, waxaa isu iman doona in ka badan 70 Xildhibaan oo golaha degaanada ah, ayna wehelin doonaan qaar kamid ah Xildhibaanada ugu cad cad Goalaha Baarlamaanka Uk, waxaana si aqlabiyad ah loogu codeyn doona inay Magaaladda Sheffield dal Madax banaan oo adduunka ka jira u aqoonsan tahay waddanka Somaliland, arrintaas oo ah markii koobaad ee bogcad dunida kamid ah ay ka dhacdo tan iyo 1960, in Somaliland laga aqoonsado. Xubnaha firfircoon ee hawshan gadhwadeenka ka ahi waxay hore booqasho ugu tageen xarunta Baarlamaanka Yurub bishii Oktobar 2012, waxaana ay ku guulaysteen inay ka soo dhaadhiciyaan qaddiyada Somaliland, waxaa booqashadaas fududeysay Linda McAvan MEP oo laga soo doorto Yorkshire iyo Humber.
Hawshan lagu Ictiraafayo Soomaliland bishan April 2-deeda waxaa gacan buuxda naga siiyey Maxamed Macruuf oo ah Xildhibaan laga soo doorto Golaha deegaanka Magaaladda Sheffield oo ay tageerayeen Neale Gibson oo isna ah Xildhibaan, waxaa iyana hawshaas tageero iyo caawimo buuxada ka gaystay Xildhibaanada Baarlamaanka Uk ee Paul Blomfield iyo Clive Betts oo laga soo doorto iyanaga magaladda Sheffield, iyagoo sidoo kale kamid ah Xildhibaanada Baarlamaanka UK ee u xilsaaran arrimaha Somaliland iyo dalkaasi Somalia.
Jaaliyadda Somaliland ee ISRAAC oo ay la shaqaynayaan Xildhibaanada golaha deegaanka ee Mohammed Maroof, Neale Gibson iyo kuwa Baarlamaanka UK Paul Blomfield (MP) iyo Clive Betts (MP) waxay ku guulaysatay in Golaha deegaanka oo u badan Xisbiga Labourku ay aqoonsi buuxa siiyaan Jamhuuriyadda Somaliland, sidoo kalena dawladda imminka talada haysa ay culays ku saaraan sidii guud ahaan dhulweynaha Britain iyo caalamku aqoonsi buuxa u siin lahaayeen Somaliland, waa arrin guul ah waana arrin cadaadis ku saaraysa Xukuumadda Uk inay bedasho Siyaasaddeedii Somaliland ay kula dhaqmi jirtay.
Xubnaha hawshan baaxadda leh gadh wadeenka ka ahi waxay kala yihiin Neale Gibson, Mohammed Maroof(Twitter: cllrMaroof), Caydarus Hussein Sahal, Ahmed Qaadi Mohamoud, Ismail Dualeh Yussuf iyo Adam Ahmed Yusuf.
Waxay xubanha guddigani u mahadcelinayaan cid walba oo hawshan baaxadda leh kala qayb qaadatay kuna caawisay, taas oo ay ugu horeeyaan dhammaan hablaha ururka Tusmo oo ay hormuud u ahaayeen Xaali Jama (Kawle), Nadira Saeed, Rooda Maxamed Xuseen, Nadia Saeed, Hinda Caydiid, Farhiya Bidhe, Zahra Yousuf Sahal.
Waxaa kale hawshaas qayb libaax ka ka qaatay oo aan u mahadcelinaynaa dhammaan Jaaliyadda reer Sheffield oo ay ugu horeeyaan Barre Aw gaab Dagaal, Yaasiin Qarbooshe, Mujaahid Cabdiraxmaan Gees, Axmed Jawhari, Suldaan Cabdillaahi Cali Cartan, Canab Cali Gaas iyo qaar kale oo badan.
Ugu dambayn, Waxaan soo dhaweynaynaa wefdiga heer qaran ee ka socda Dawladda Somaaliland ee u imanaya hawshan qiimaha leh, si ay ula qaybsadaan farxaddan Jaaliyada reer Sheffield ee UK. Sidoo kale Waxaanu dhammaan jaaliyadaha rer Somaliland ee ku dhaqan Gobolada Uk la socodsiinaynaa inay ka soo qayb galaan dabaaldegga maalintan lagu dhawaaqayo Aqoonsiga oo ah Arbacada soo socota ee bishu tahay 2da April 12.30 galabnimo ayna yimaadaan Councilka Sheffield Hortiisa. Waxaan si gaar ah u marti qaadaynaa Safiirka Somaliland ee UK Mudane Cali Adan Cawaale, Madaxa TVga Qaranka ee Yurub Cabdiraxmaan Maxamed Adan iyo Gudoomiya Baarlaamka Somaliland Mudane Cabdiraxman Cabdullahi Ciro Iyo Waftiga cuslus ee ay soo dirayso Xukuumadda Jamhuuriyadda Somaliland. Sidoo kale waxaa maalintaas iman doona Saxaafadda Caalamiga ah ee ay kamidka yihiin BBC-da Aljazeera iyo Wargaysyo tiro baan.
Wixii Akhbaar dheeraad ah la soo xidhiidh
Adam Ahmed Yusuf (Sawaaxili) – Chair of Somali Community Association in Yorkshire and Humber: Tel. 07957888400