Hargeysa (Berberanews) – Ciyaar lagu xusayey maalinta dhallinyarada Somaliland ee 20-ka February oo sannad walba la maamuuso, ayaa labada kooxood ee Sagal Jet iyo Tima-cadde ku dhexmartay garoonka Kubadda Kolleyga ee Tima-cadde ee caasimadda Hargeysa gelinkii dambe ee shalay.
Ciyaartan oo ahayd tartan lagu kala qaadayey koob loogu talogalay xuska maalintan, si wadajir ahna ay u qabanqaabiyeen Xidhiidhka Kubadda Kolayga Somaliland iyo ururka Dhallinyarada Somaliland ee SONYO, waxa ku guulaysatay kooxda Sagal Jet oo ku badisay ciyaarta 49 dhibcood, halka kooxda Tima-cadde heshay 29 dhibcood.
Gunaanadkii ciyaartaas waxa kooxda Sagal Jet halkaa ku guddoonsiiyey koobka loo dhigay Guddoomiyaha Xidhiidhka Kolleyga Somaliland Mr. Maxamuud Xasan Cabdillaahi.
Ciyaartan ayaa qayb ka ahayd xaflado waawayn oo meelo kala duwan oo dalka ah loogu sameeyey xuska maalinta dhallinyarada Somaliland ee 20-ka February oo ku astaysan dhagax-tuurkii UFO ee caasimadda Hargeysa ka dhacay sannadkii 1982-kii.
