Kenya(berberanews) Booliska dalka Kenya ayaa su’aalo weydiinaya ruux Soomaali ah oo ay ku eedeeyeen inuu doonayay inuu dilo M/weynaha Kenya Uhhuru Kenyatta.
Ninkaan oo magaciisa lagu sheegay Saciid Mire Siyaad oo 46 sanno jir ah ayay ciidamadu sheegeen inay xireen maalintii Talaadada ee todobaadkaan waxaana laga qabtay banaanka guriga M/weyne Kenyatta.
Saraakiil booliska Kenya ka tirsan ayaa u sheegay wakaaladda wararka AP in Saciid uu ciidamada illaalinayay guriga M/weynaha uu weydiistay in loo fasaxo guriga si uu ula kulmo M/weynaha iyo hooyadiis kadibna ay xireen.
Warar ay hay’adaha amaanku soo saareen ayaa waxay ku sheegeen in hadda la baarayo Saciid oo ay ku tuhunsan yihiin inuu doonayay inuu dilo M/weynaha Kenya.
Shalayna maxkamada sare ee dalka Kenya ayaa amartay in baaris dheeraad ah la galiyo kiiskaan ninkaan Soomaaliga ah ee lagu eedeeyay inuu qorshaynayay dilka M/weynaha wadanka Kenya.
Dhanka ehelada Saciid ayaa iyana warbaahinta Kenya u sheegay in Saciid uu yahay ruux maskax ahaan jiran oo uu dhimirka la’yahay tan iyo sanadkii 2004,kii.
Axmed Mire oo Saciid la dhashay ayaa sheegay inay dhawaan magaalada Nairobi u tageen si ay u daaweeyaan hase ahaatee ay Talaadadii waayeen kadibna loo sheegay in ciidamada argagixiso la dirirka uu u xiran yahay.
“Waxaan aaminsanyahay in Saciid uu xiran yahay Soomaalinimada iyo Islamnimada waayo waa ay ka muuqataa inuu yahay qof dhimirka la’a” sidaas waxaa yiri Axmed Mire.
