Boosaaso (Berberanews)- Kooxo hubaysan oo aan la aqoonsan haybtooda, ayaa magaalada Boosaaso ee maamul-goboleedka Soomaaliyeed ee Puntland ku dilay sarkaal ka tirsan ciidanka nabad-sugidda ee maamulkaas maanta.
Dablayda hubaysan oo la sheegay inay in muddo ah ku daba jireen saraalka ay dileen, ayaa baxsaday.
Falka lagu toogtay sarkaalka ka tirsan ciidanka ammaanka maamul-goboleedka Puntland, ayaa ka dhacay meel u dhow dekedda Boosaaso, iyagoo dablayda oo ku hubaysnaa baastoolado ay weerar gaadmo ah ku qaadeen, kadibna rasaas badan ku fureen.
Sida ay xaqiijiyeen dad goob-joogayaal ah, ciidammada ammaanka ayaa wax yar kadib gaadhay goobta dilku ka dhacay, balse way ku guuldarraysteen inay gacanta ku dhigaan dablayda khaarajiyey sarkaalka ka tirsanaa nabad-sugidda Puntland.
Weerarrada lagu khaarajiyo saraakiisha iyo ciidammada maamulka Puntland, ayaa ku sii kordhaya magaalada Boosaaso, iyadoo falkan u dambeeyey ku beegmay xilli ciidanka maamulkaasi dagaal kula jiraan dagaalyahannada Al-shabaab ee fadhiisinka ku leh degaannada buuralayda Galgala.
