Hargeysa(Berberanews) – Safaaradda Dawladda Taiwan ee Somaliland oo Wasaaradda Horumarinta Beeraha JSL kala shaqaysa Horumarinta Beeraha, ayaa Iskaashatooyinka Beeraha ee Gobolka Gabiley u qaybisay Qalab muhiim u ah wax-soo-saarka Beeraha.
Waaxda Beeraha ee Safaaradda Taiwan, ayaa Afar Iskaashato oo ka mid ah Beeralayda deegaannada Arabsiyo, Agamsaha, Huluuq iyo Ceel-giniiseed u qaybiyey 90 Taangi, 90 Tuumbooyinka Waraabka Beeraha iyo noocyo kala duwan oo Siidh ah.
![](https://i0.wp.com/www.berberanews.net/wp-content/uploads/2023/05/fb_img_16833990295496318019206327764061.jpg?resize=696%2C521&ssl=1)
Taangiyada ayaa waxa la socda Tuumbooyinka Waraabka oo gaadhaya illaa 45 Mitir iyo qalabkii lagu rakibayey.
Munaasibadda Taiwan ku bixisay Siidhka iyo qalabka kale, ayaa goob-joog ka ahaa Masuuliyiinta Wasaaradda Horumarinta Beeraha Somaliland, gaar ahaan Waaxda Cilmi-baadhista oo uu hoggaaminayey Agaasimaha Waaxdaasi Axmed Nuur.
Qalabkan oo muhiim u ah Horumarinta Wax soo-saarka Beeralayda Somaliland, ayaa Masuuliyiinta Wasaaradda Beeruhu waxay uga Mahad-celiyeen Dawladda Taiwan.
![](https://i0.wp.com/www.berberanews.net/wp-content/uploads/2023/05/fb_img_16833990363353006468338790156694.jpg?resize=696%2C313&ssl=1)
Waxa xusid mudan, In Beeralayda loo qaybiyey Qalabkan ay Tababbar siiyeen khuburrada Waaxda Cilmi-baadhista ee Wasaaradda Horumarinta Beeraha Somaliland, kuwaasi oo sidoo kale ku Wacyigeliyey inay ka faa’idaystaan Qalabkan, daryeelaan isla-markaana dhowrtaan, si ay Muddo dheer u Munaafacaadsadaan.
![](https://i0.wp.com/www.berberanews.net/wp-content/uploads/2023/05/fb_img_1683399041354924088953696796789.jpg?resize=696%2C522&ssl=1)